امتال حجازية

موضوع: امتال حجازية الأربعاء مارس 02, 2011 7:50 am

هلا وغلا بالجميع....

أنا اليوم جاية وجايبة معايا مجموعة من الأمثال والمصطلحات الحجازية........
معروف إن الأمثال هي نوع من انواع الثقافة الشعبية تتردد على السنة الناس
بشكل طريف وذو فائدة عظيمة....... وقد تتوارث شفاهيةً من جيل إلى جيل أخر.

الأمثال الشعبية لها نصيب كبير بين الناس في المملكة ولها مكانة خاصة عند
أهل الحجاز ولا تكاد إمراة حجازية بالذات إلا ما تتخلل الأمثال والمصطلحات
الخفيفة في كلامها.....

أنا راح اذكر بعض الأمثال والمناسبة إلي ممكن تنقال فيها...... وبما إني
راح اسرد أمثال حجازية كمان راح يكون التفسير باللكنة الحجازي.........ممكن
ينذكر المثل في أكثر من مناسبة لكن أنا راح اكتفي بذكر مناسبة واحدة لكل
مثل أو مصطلح ........ لكن قبل ما نبدأ لأبد من معرفة معنى المثل

تعريف المثل ........ المثل الشعبي هو تعبير
عن نتاج تجربة شعبية طويلة أدت إلى عبرة وحكمة، وتؤسَّس على هذه الخبرة
الحض على سلوك معين، أو التنبيه من سلوك معين

وهناك تعريف أخر للمثل على أنه جملة مفيدة موجزة متوارثة سفاهة من جيل إلى جيل. وهو جملة محكمة البناء بليغة العبارة، شائعة الاستعمال عند مختلف الطبقات.
نبدأ وبالله المستعان.......

• يقطع الخل على الخردل على بياع الليمون.هذا المثل ينقال لما يكون قدامك اكتر من خيار ولا يكون عاجبك ولا واحد فيهم فتقول كلة زي بعضة الخردل والخل والليمون.. يعني كلة حامض

• عتبة الباب تقول لدرجة السطوح اللي يجي يجي واللي يروح يروح
هذا المثل ينقال في حالة إنة ما يهمك ايش يحصل من حواليك مين يجي ومين يروح وإنت محلك سر يعني كلة سيان...

• ابلة فتو بتكلم ابلة روحية وبعد السلام والتحية بتقولها .. مين جايك يا روحية اليوم...
ردت روحية..... مين يعني الثلاثة المذكورة الشبة والزرنيخة والنورة
اظن المثل واضح فين يستخدم في إنة لما تسالأ شخص مين راح يجيك بالعزيمة...
بس الي ما تعرفوة إنة مع إن كل وحدة من الشبة" بودرة تستخدم لإزالة
الروائح" والزرنيخة" ما اعرف في إيش تستخدم" والنورة " تستخدم في
البناء"لها إستخدام مختلف بس العامل المشترك بينهم هو أنة كلهم لونهم
ابيض..

• ربي يا خايبة للغايبة
هذا المثل ينقال للأم الي تربي وتتعب وفي الأخير بيروح الولد على طبق من فضة للزوجة وياعالم هية راح تكون طيبة ولا لا ..

• ابدعت استاذ خليفة...
نجي لأستاذ خليفة.... دي العبارة بتنقال في حالة لما يكون هناك شخص ابدى راي جميل او سوى عمل حلو ..... فية نوع من الثناء مع المزح

• غسلت الدجاجة رجليها ونسيت إلي جرى عليها..
هذا المثل لة إستخدامات كثيرة فممكن ينقال في وحدة تقول ياي إنتوا كيف تسوا كذا .... بمعنى طلعت القصر بس من امس العصر.

• بعد ما أكل واتكى قال أكلكم فية مستكة........ وفي ناس تقول ريحتة مستكة
وهذا ينقال خصوصاً للرجال الي مهما تسوي لة الحرمة برضوا يعيب بالشي

• سبحان العاطي الوهاب من بعد الشبشب والقبقاب.... تقريباً لة مفهوم مثل غسلت الدجاجة رجليها.......
• ولأجل عين تكرم مدينة ...... وهذا طبعاً ما يحتاج تفسير واللبيب بالإشارة يفهموا

بصراحة انا لو راح اكتب من دحين لبكرة مار راح اخلص .......و ما زال في
جعبتي الكثيييييييير وراح اكتبها في وقت ثاني ........ انتظروني

إذا أي مثل من السابق ما إنفهم كويس ممكن اعيد او اذكر حالة ثانية تكون اوضح