الناس وأوصافهم

السلام عليكم

اهناك ناس تكرههم من اوّل ليله
واهناك ناس ما يهُونوا سْنين طويله

* * *
اهناك ناس حبايب
واهناك ناس تكرهْم بْغير سبايب
ولا عقل عامر كيف عقل الخايب
ولا وْجوه تَنْدى كي وجوه بخيله


* * *
اهناك ناس يا مَحْلاهم
واهناك ناس ما تَقْدراتعيش بلاهم
واهناك ناس حسْدِيَّه وسُود نْياهم
ثْياب بِيض من بَرَّه وجَوَّه نِيله


* * *


اهناك ناس غَوالي
حتى ان باعَدوا ما كَيفْهم لا والي
حمَّالين للسَّيَّه ابْطَوعة بالي
علي خطّْهم ما عندهم تحْويله


***


واهناك ناس عشْرتْهم خَطَا طَوّالي
مكتوب في جباهِهم خَراب العَيله
واهناك ناس تعْزم واليدَيْن خَوالي
واهناك ناس تَبْخل والجّيُوب ثقيله
هدايات مالرّب الكريم العالي
وبُو طَبْع ما تنفع مْعاه الحيله


* * *


اهناك ناس ما تَقْبلهم
واهناك ناس لك غايه تْجول لْهَلهم
واهناك ناس لا دارَوْا خَطَا تحملهم
واهناك ناس في عَقْلك لهم تجْفيله
واهناك ناس عالحَيِّين لا تجْملْهم
اللي تْجيك منهم مالْها تبديله
ولا يفْرقْوا ظنِّي الا بْعَمَلْهم
ما حَدْ علي التّسْعه مْزَوّد لَيْله
واهناك ناس ما يَنْسوا اللي صارْلهم
يردُّوه بعْباره ووافي كَيْله
واهناك ناس لا هبّْ الهْبوب خَبَلْهم
ونسْيَوا اللي عدَّى وضاع جميله
ولا خير في اللي ما يْبات عَلَلْهم
ولا فالخَـــلِيل انكان فاتْ خليله


* * *


اهناك ناس يا مَبهاهم
واهناك ناس تُوعدْهم وما تَلقاهم
وان قابلتهم تَلقى العَذَارْ معاهم
امْجَهّْزيَّنه ما عندهم تعْطيله
كلامْهم اللي قالَوْه ضدّ انْياهم
انكان بَحّروا ينْوُوا عل التّقبِيله
احتار في مْوَدّتهم اللي ماشاهم
مربّْيِينَّه شاطب وحَار دليله
لصحاب كيف في صفّ العدو تلقاهم
صحْبتْهم مْعاك مغير نَصْب وحِيله
قِريب نقْصهم منَّك بعيد وفاهم
مَشْيُول عالدّبَر في حمْلهم تمْيِيله
مفتوح عالخْساره بَيْعهم وشْراهم
السّتْرَه مْع بو صَحْبَين قليله


* * *


اهناك ناس اماره
واهناك ناس ما ظنِّي يساوُوا باره
واهناك ناس تلقى سَعْيهم فالكاره
وأرزاق واجْدَه غير النّفوس بخيله
والمال في قليل العزْم راهْ خْساره
حتى وهُو حَكيم بعلْم في تعديله
واهناك الفقير وما يسَيّب عاره
حتى إنكان ما عنده الْيَدّ طويله
وإن ما كان في جَيْبه قضا من جاره
علي قيْس نِيتَه ربّْنا يعطيله
مَوْكار الصْقُوره ما تْجيه حْبَارى
ولا مْرَوّمَه تَلْحَق ثمَنْ لاِصيله
وحظّك اللي ترْميه مالبذّاره
يَطْلع بْعَينه تحْصدَه وتْشِيله
والجَّدِي لو تقَوَّى نين فات حَكاره
ان يَبْقى علي شَيْل الحْمُول هَزيله
وشْوف الجمّل حتى إن خفّ عْباره
صِليبه علي حمْلَه اخْرى ترْمِيله
شديد العَصَب حَمَّال في مشواره
قطّاع الفيافي وين مَدّ رحيله
إن راد ربّْنا ما حَدْ يسيِّب كاره
الرّاس راسْ والواطي ان زال وذيله


********


اهناك ناس يا مَبسَلْهم
لا غَريب يَقْبلهم ولا من هَلْهم
واهناك ناس في الحَيِّين شَيْن عَملْهم
ذكَرْ نخِيل لا رَمْيَه ولا تظْلِيله
عَلْقم وحَنْظل وين ما تاكلهم
وان رافقتهم يبْقَوا عليك عَدِيله
وان نازلتهم بالدّار جار لْهَلهم
علَيْ عيْب عَيّل يجْردُوا بالعَيْله
علي جارهم ديما يزيد عَلَلهم
قْلال الْعنَا لا جَتْ الدَّلو ثقيله
* * *


مــــــــــــــنـــــــــقـــــــــــول

هذه القصيدة نظمها الشاعرسعيد يونس شلبي "رحمة الله عليه"
سنة 1933 م
والله أعلم